Friday 9 August 2013

ಕಾಲ ಗತಿ



ಕಾಲಚಕ್ರಕ್ಕೊಂದು ಕೀಲಿ ಮಾಡಬೇಕೆಂದಿರುವೆ 
ಕುಂಟದೆ, ಓಡುವ ವೇಗಕ್ಕೊಂದು ಕಡಿವಾಣದಂತೆ 
ಮೊನ್ನೆಯ ಬಾಲ್ಯದ ಮುಗ್ದತೆಯಳಿಸಿ 
ನಿನ್ನೆಯ ಯವ್ವನದ ಮಿಡಿತಗಳ ಮರೆಸಿ 
ವರ್ತಮಾನದ ಜೀವ ಜಾಲದಲಿ ಸಿಕ್ಕಿಸಿ 
ನಾಳೆಯ ಚಿಂತೆಗೆ ಒರೆ ಹಚ್ಚಿಸಿದ..... 
ಮುಂಜಾವಿನ ಇಬ್ಬನಿ ಒಣಗುವ ಮುನ್ನ 
ಮದ್ಯಾಹ್ನದ ಉರಿಬಿಸಿಲ ತಾಕಿಸಿ
ಸಂಜೆ ಬರುವ ಮುನ್ನವೇ ನಿತ್ರಾಣವಾಗಿಸಿ 
ಕಳೆದುದನ್ನ ಮೆಲ್ಲುವಂತೆ ಕುಹಕಿಸಿದ ಈ.... 
ಗತಕಾಲಕೆ ಆಮಂತ್ರಣವಿತ್ತರೂ ಬರಲಿಲ್ಲ 
ಗತಘಟನೆಗಳೆಲ್ಲ ಇತಿಹಾಸವಾಯಿತಲ್ಲಾ !
ಮಿತಿಯಿರಲಿ ಚಲನದಲೆಂದು ರವಿ ಶಶಿಗೆಂದರೂ 
ನಡೆಯುತ್ತಿಹರು ಆ ಕಾಲನನುಮತಿಯಂತೆ.... 

Sunday 4 August 2013

ಆತ್ಮ ಸ್ನೇಹಿತ




ನನಗರಿತಂತೆ ನನಗಿಹನೊಬ್ಬ 
ಆತ್ಮೀಯ ಗೆಳೆಯ ನನ್ನೊಳಗೆ 
ನನಗರಿವಂತೆ ರವಾನಿಸೆಂದನು 
ಸ್ನೇಹ ಸಂದೇಶವ ನಿಮಗೆಲ್ಲರಿಗೆ !

ಅವನಿಲ್ಲದೆ ನನಗೆಲ್ಲಿದೆ ದ್ಯೈರ್ಯ 
ನಿಮ್ಮೆಲ್ಲರ ಸ್ನೇಹ ಪಡೆಯವ ಸ್ಥೈರ್ಯ 
ಅವನಾಸೆಯಂತೆ ನೀವೆಲ್ಲರೂ 
ಮೆಚ್ಚಿ ಹೆಚ್ಚಿಸಿದಿರಿ ಸ್ನೇಹ ಸೌಂದರ್ಯ !

ಅಚ್ಚಳಿಯದೆ ಉಳಿಯಲೆಮ್ಮ 
ಸಚ್ಚರಿತೆಯ ಶುಭ್ರ ಸ್ನೇಹಹಂದರ 
ಬಿಚ್ಚಿಕೊಳ್ಳದೆ ಹೆಚ್ಚೆಚ್ಚಾಗಲೆಂಬುದೆ
ಎನ್ನ ಮನಸಿನಾಶಯ, ಮಹಾದಾಶಯ !!