ಸಂಗಾತಿ-ಸವತಿ

ಮಗ್ಗುಲಲೇ ಬಂದು ಮಲಗುವ

ಕವಿತಾ ಪದಗಳಿಗೆ

ಬೆಚ್ಚನೆಯ ಹೊದಿಕೆ ಹೊದ್ದು

ಬಳಿಯಲ್ಲಿಯೇ ಮಲಗಿಸಿಕೊಳ್ಳುವೆ

ಮುಂಜಾನೆಯ ಬಿಸಿ ಕಾಫಿ ಕುಡಿಸುವೆ

ಬೆಳಗ್ಗಿನ ನಾಸ್ತ ಕೊಡಿಸುವೆ

ಮತ್ತೆ ಆಫೀಸಿಗೆ ಹೋಗುವಾಗ

ಕಾರಿನೊಳಗೆ ಕೂರಿಸುವೆ

ಕೆಲಸದೊತ್ತಡದ ನಡುವೆಯೂ

ಅದರ ಜೊತೆ ಮಾತಾಡುತ್ತಿರುವೆ

ಮಧ್ಯಾಹ್ನದ ಊಟದಲ್ಲೂ 

ಅದಕ್ಕೆ ಸಮಪಾಲು

ಮುಸ್ಸಂಜೆಗೆ ಮೈಯೊಡ್ಡಿ

ನಿಂತಾಗಲೂ ಜೊತೆಯಲ್ಲಿಯೇ

ಕೂರಿಸಿಕೊಳ್ಳುವೆ

ಅವಳಿಗಂತೂ ವಿಪರೀತ ಹೊಟ್ಟೆ ಕಿಚ್ಚು

ನನಗಿಂತ ಅವಳೇ ಇಷ್ಟ ನಿಮಗೆ

ಹಾಗಾದರೆ ನನ್ನನ್ನೇಕೆ ಕಟ್ಪಿಕೊಂಡಿರಿ

ಅನ್ನುವ ಗೊಣಗು ದಿನಾ ಅವಳದ್ದು

ಅವಳೂ ಬೇಕು, ಇವಳೂ ಬೇಕು

ಇಬ್ಬರೊಂದಿಗೆ ಬಾಳು ನಡೆಸಬೇಕು

ನೀವೇ ಹೇಳಿ ನಾನೇದರೂ ತಪ್ಪುದಾರಿ

ಹಿಡಿದಿದ್ದರೆ ಕೋರ್ಟಿಗೆ ಹಾಕಿ

ಶಿಕ್ಷೆ ಕೊಡಿಸಿ.